Стихотворения

Нас посетили

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterСегодня95
mod_vvisit_counterВчера217
mod_vvisit_counterНа этой неделе838
mod_vvisit_counterНа предыдущей неделе1853
mod_vvisit_counterЗа месяц13332
mod_vvisit_counterЗа прошлый месяц18702
mod_vvisit_counterВсего339625

Стихотворения
Эзан сеси PDF  | Печать |

Акъшам устю, эзан сеси джанъгъыра,

Дертлилерни Хакъ къатына чагъыра.

Эзан сеси – минареден джайыла,

Кокке чыгъа, мунълу, ёргъун байыла...

Чай къатында акъ сакъаллы къартбабай

Титрек къолун салкъын сувда увалай...

Деренлерден «Алла!» сеси хош келе,

Акъ манълайлар джерге тие, юкселе...

Мен гъарипмен, месджидим ёкъ киреджек...

Михрабына мунълу бетим сюреджек...

Эзан сеси бу якъларгъа келалмай,

Татлы, татлы къулагъыма тиялмай...

Акъ сакъаллы къонъшу мазин яшаймы?

Кене «Алла!» деп сёзюне башлаймы?

«Алла!» десе эшиткенлер боламы?..

«Танърым, къуртар!» деп джамиси толамы?..

Ёкъсам кене бир-бирини къаргъайлар?

Бир-бирини джакътырмакъчюн джылайлар?..

Озюн ташлап, гъарип джурткъа сарылгъан,

Бармы «Джуртум!» деп сесчиги къарылгъан?..

«Хакъ!» дегенде не дуасыз джурт ичюн?

Джурт кемирген бир къач мелюн къурт ичюн?

Эзан сеси бу якъларгъа келалмай,

Татлы, татлы къулагъыма тиялмай...

Эп джамилер шай къапанмай бир гедже,

Къарт мазинлер ольмез бурун гизлидже...

Джыйлышынъыз, эзан сесин къачырмай,

Гунанъызны Салгъырдайын ташырмай...

Къол котерип акъ юрекмен коклерге,

Башынъызны ялмай къойып серт ерге,

Хакъ къатында юрт савлыгъын тиленъиз!

Озюнъизге яхшы олюм истенъиз!

Эзан сеси бу якъларгъа келалмай,

Татлы, татлы юрегиме тиялмай...

Будапешт,

1918 с. майыс 16

 
Тувгъан тиль PDF  | Печать |

Сени мен Къырымда, Къазанда таптым,

Джурегим къайнагъан, ташкъанда таптым...

Джат эльде мугъайып, ачынып джурьгенде,

Умютим, хаялым шай тюшип джурьгенде,

Мойнунъа сарылдым, дертимни айтып,

Бир гузель сёзюнъмен озюме къайтып...

Джырларынъ болмаса, маненъ болмаса,

«Джурт» деген сёзюнъмен джурек толмаса,

Ах, насыл джурермен гъурбет якъларда,

Танышсыз, билишсиз ят сокъакъларда?..

Бильмиймен – тюрюкми, татармы адынъ,

Бек яман татлысынъ, Танърыдан тадынъ.

Тюрюк де, татар да сенинъ сёзлеринъ,

Экиси эки чифт мунълу козьлеринъ...

Вияна огюнде, Къазакъ ичинде

Барабар джырладыкъ Индлерде, Чинде...

Анъласын бир сени, душман да сюер,

Бир джаныкъ сёзюнъмен джуреги иер...

Истиймен озюнъни эр якъта корьмек,

Эр ерде инджинъден дестанлар орьмек...

Къушларгъа, къашкъыргъа уйретсем сени,

Сен болсанъ оксюзнинъ конъюльден сюйгени...

Джамиге, михрапкъа, сарайгъа кирсенъ,

Денъизлер, чёллернинъ четине эрсенъ...

Сенинъмен душмангъа ярлыкълар язсам,

Къарувлы сёзюнъмен конълюни къазсам...

Къабримде мелеклер соргъу сораса,

Азраиль тилимни бинъ кере тораса, –

«Озь тувгъан тилимде айт магъа!» дермен,

Озь тувгъан тилимде джырлап олермен...

Конълюмни къайгъылар кемирип тургъанда,

Халкъымны тынышсыз йылдызы ургъанда,

Тувгъан тиль, – башкъасы акълыма кельмий,

Бир буюк сырымсынъ, душманлар бильмий...

Будапешт,

1918 с. июнь 1

 
Такъдирге PDF  | Печать |

Джаш къызларны дёрт дуваргъа къапап къойгъан

Тек факъырнынъ къысметини ашап тойгъан –

Сенсинъ, залым, козюнъ чыкъсын!..

Мезарынъны селлер джыкъсын!..

Тувар-тувмаз сабийлерни алып кеткен,

Подробнее...
 
Къоркъакъ PDF  | Печать |

Эр кольгеде бинъ джан берген, яшаткъан,

Дивардаки эр сызыкъны джин, шайтангъа ушаткъан...

Сандычыгъы чырт-чырт этсе, бошаса,

Къапысыны чик-чик эткен сары къуртлар ашаса,

Бош тюфекке «шайтан иши, патлар!» деген эр заман,

Подробнее...
 
<< Первая < Предыдущая 1 2 3 4 5 Следующая > Последняя >>

Страница 4 из 5